Puisi Sunda

Puisi Sunda

Setiap daerah memiliki ciri sendiri – sendiri dengan daerah lainnya. Dinegeri ini kaya akan seni dan budaya termasuk syair, sajak ataupun puisi. Salah satu daerah yang kaya akan puisi adalah daerah Sunda Jawa Barat. Di daerah ini banyak sekali ditemukan puisi – puisi dengan bahasa Sunda. Berikut ini kami persembahkan puisi sunda yang kami ambil dari berbagai sumber.

Ayeuna

Jeujeur harupat tuluy ngipisan

indung suku tuturut peot

awak jadi budak

waragad teu walakaya

geuning teu di kawit teu di pungkas

kokojayan dina lantaran

sebrot hareudang hiliwir angin

ngalengkah numut sarangenge

los kaditu los kadieu

ngarenghap tuluy hah heh hoh

mmm, ngajerit diudag seuri

Nya ayeuna mah ayeuna...

Bulan ngalimba

sanajan bulan tumunggal

caangna mah bati nu hegar

bangun nu teu ngemu tunggara

sanajan bulan nyorangan

teu risi ngambah sagara peuting

nganti bentang nu baris marengan

nganteur nyorang simpena peuting

nepi ka balebat nyampeur

nyinglarkeun kahieum ati

Hirup

Hirup teh cita-cita

ngudag-ngudag mangsa jeung rasa

Hirup teh tunggara

upama tresna kalid sulaya

Hirup teh seuneu

nu ngaduruk lulurung sukma

Hirup teh ibadah

rela ihlas ngumawula

Hirup teh aci-acining:

Bagja!

Ibun harepan

kamari rundayan katineung rek dipalerkeun

bongan mawa eurih

nu ngageuri kana ati

ngabudalkeun kingkin

jeung rambisakna rasa

tadi,

ku naon salira ngaririhan deui

mawa ibun sanajan sakeclak

nu nyirungan deui katineung

nu ngahaja rek disinglar

duh gamparan,

guligahna rasa

hamo bisa disidem deui..

Hirup Ngan Ukur Cenah

Sajak Iwan M. Ridwan

Cenah hirup teh jalan nu pagaliwota

Sedeng cinta ngan saukur teteguhan

Urang bebas leumpang mapay nu can kasorang

Nyorangan atawa babarengan teu jadi sual

Di mana aya kacinta di dinya urang bakal ngalalana

Cenah hirup teh kabel nu pakuranteng

Sedeng cinta ngan sakadar layar monitor

Sing nyalse. Sing daria. Tumaninah.

Sabab jaga teuing kumaha boa

Di mana aya tunggara di dinya urang eureun ngalalana.

Cenah hirup ayeuna teh di dunya

Sedeng cinta teuing di mana ngancikna

Handapeun Sora Sit-uncuing

Sajak Iwan M. Ridwan

Sit-uncuing ngelak maseuk kota

Nyelangan gerung kored mesin

Memeh pindah kana gurat jukut sejen

Handapeuneunana balawiri nu ngulon ngetan

Tuturubun ngudag jeung diudag waktu

“Bisi teu kasampeur nu lebah pengkolan!” ceuk hatena

Ngomong ka panon poe nu teu malire

Renghap ranjug dayeuh beuki sumpeg

Katarajang panyakit mengi sabab paru-paruna geus karancang

Dina tikorona menet reuhak peradaban

Ngagulung jeung teknologi

Jeung runtah

Handapeun sora Sit-uncuing manglaksa kacangcaya teu kungsi mulang

terus ngamalir ka rorotek jalan nu brasna ka poe kiamat

Suci Dulife ‘10

Da cinta nu saéstuna tara laas ku robahna mangsa

Rongkah, rohaka tumerap na dadasar kalbu

Nu bisa ngarungkup gunung,

ngojayan jaladri, meuraykeun jaladra

Urang suaykeun rupaning lalangsé

Urang halingkeun aling-aling

Wilujeng milangkala, jungjunan…

Bulan Masih nu Baheula

Sajak Rizal Sabda

Karasa ayeuna mah Yan

lalampahan téh geus natrat

kajeueung di péngkolan

bulan béngras kénéh

nyaangan léngkah gejed urang

nu ngandelkeun gandeuang basajan

Yan bulan masih nu baheula

najan cahyana dicangkalak katunaan

wirahmana angger marengan réngkak urang

nu éstu rimbil ku harepan nu can kalakonan